Myndir og frásagnir

Barðsneshlaup 2002 fór fram á laugardagsmorgni verslunarmannahelgar að venju. Þátttakendurnir 30, 10 konur og 20 karlar mættu á Bæjarbryggjuna í Neskaupstað kl. 8.30 og voru fluttir með hraðbát Björgunarsveitarinnar Gerpis frá Neskaupstað yfir Norðfjörð að Barðsnesi og gekk það mjög vel.

Hlaupið hófst kl. 10 í sólskini, sunnan vindstrekkingi og 17 stiga hita. Þegar kom inn í fjarðarbotnana hægði vind og hlýnaði. Hæfilega mikið vatn var í fjallalækjunum og kom það sér vel þar sem drykkjarstöð vantaði í Viðfirði og á Götuhjalla. Flestir höfðu drykkjarílát með til að ausa úr lækjunum. Þótt stormur og rigning væri víða um land var Austfjarðablíðan uppá sitt besta með sól, sunnan golu og logni í innfjörðum og setti þetta svip á hlaupið.

Hiti fór allt upp í 26° og hægði það talsvert á frískum hlaupurum sem ekki höfðu gætt þess að drekka nóg. Máttu þeir jafnvel horfa á eftir öðrum sér ófrískari sem meira höfðu drukkið og skokkuðu framúr. Þarna virtist gilda gamla reglan: 1% tap á líkamsvökva þýðir 10% orkutap. Þrír hlauparar villtust af leið vegna ófullnægjandi merkinga við Grænanes í Norðfjarðarsveit. Önnur mistök urðu ekki.

Eftir að flestir þátttakendur höfðu farið í sundlaugina og heita pottinn sem eru í 2 mín göngufjarlægð frá markinu fór fram verðlaunaafhending við fjölmenni.

Hjálmdís Zoéga, Neskaupstað hafði bestan tíma kvenna þriðja árið í röð o2: 59: 40 og hlaut til eignar kvennabikarinn, gefinn af versluninni Við lækinn (fyrri tímar Hjálmdísar 02: 39: 23 og 02: 44: 37).

Þorbergur Ingi Jónsson, Neskaupstað hafði eins og áður nokkra af bestu langhlaupurum landsins að keppa við. Varð hann fljótastur þriðja árið í röð á sínum besta tíma og brautarmeti 02: 09: 35 (fyrri tímar 02: 12: 19 og 02: 16: 20). Vann hann til eignar bikar þann sem keppt hefur verið um frá upphafi gefinn af flutningafyrirtækinu Viggó hf. (Rúnar Gunnarsson).

Guðmann Elísson varð annar í hlaupinu á 02: 13: 47 og fyrstur í flokki 40 ára og eldri. Hlaut farandbikar gefinn af útgerðarfélaginu Barðsnes h.f.

Þátttakendur voru ánægðir með þetta hlaup og ekki síst Austfjarðablíðuna sem kom aðkomnum á óvart.