Föstudagsgrín

Karlinn spurði Guð að því hvers vegna hann hefði skapað konuna svona fallega og aðlaðandi? "Það er svo að þú munir elska hana og gæta". "En hvers vegna er hún svona vitlaus", spurði karlinn. "Það er svo hún muni elska þig", svaraði Guð.

Hvers vegna eru giftar konur í meiri holdum en einhleypar? Einhleypar konur koma heim, kíkja í ísskápinn, loka honum aftur og fara svo í rúmið og leggja sig. Giftar konur koma heim, sjá hvað liggur í rúminu og fara því beint í ísskápinn.

Hvað þarf marga karla til þess að skipta um klósettrúllu? Það er ekki vitað því það hefur aldrei gerst.

Nú hlít ég að fara að sleppa við karlrembuviðtölin, nema ég hafi endanlega mokað yfir í þetta sinnið. :)
Lifið heil og gangið á Guðs vegum!

Aldrei veikur

Í tilefni flensudaga landsmanna þá var ég að ræða veikindadaga við vin minn og samstarfsmann en eins og gefur að skilja hefur plágan sú snert við vinnufélögum okkar og fjölskyldum þeirra, rétt eins og er um marga aðra. Eitthvert mont var í gangi og tjáði ég honum að ég hefði nú ekki tekið veikindadag svo og svo lengi, væri bara alveg hættur að vera veikur. Þá varð honum að orði: "Ég er heldur aldrei veikur, hef bara tekið svona einn og einn dag".

Og nú er það spurningin, var hann að grínast eða datt bara sannleikurinn svona óvart upp úr honum?

Maður á að segja konunni sinni að hún sé falleg, jafnvel þótt hún líti út eins og vörubíll.

Fékk þessa skemmtilegu könnun á viðhorfum barna senda og má til með að deila henni með ykkur:

HVERJUM Á MAÐUR AÐ GIFTAST?

Maður verður að finna einhvern sem hefur gaman af því sama og maður sjálfur. Ef maður til dæmis hefur gaman af íþróttum verður hún að hafa gaman af því að þú hafir gaman af þeim og sjá um snakkið og dýfuna.
Árni, 10 ára.

Það ákveður það enginn áður en hann verður fullorðinn hverjum hann ætlar að giftast. Guð ákveður það allt löngu áður og maður kemst ekki að því fyrr en það er orðið of seint.
Halldóra,10 ára.

Á HVAÐA ALDRI ER BEST AÐ GANGA Í HJÓNABAND?

Það er best að vera 23 ára því þá er fólkið búið að þekkjast í heila eilífð.
Birna, 10 ára.

Maður þarf ekki að vera á neinum sérstökum aldri, maður þarf bara að vera bjáni.
Friðrik, 6 ára.

HVERNIG SÉR MAÐUR HVORT ÓKUNNUGT FÓLK SÉ GIFT?

Maður verður bara giska út frá því hvort manni sýnist þau vera að æpa á sömu krakkana.
Daníel, 8 ára.

HVAÐ EIGA FORELDRAR ÞÍNIR SAMEIGINLEGT?

Bæði vilja ekki eignast fleiri börn
Lára, 8 ára.

HVAÐ GERIR FÓLK Á STEFNUMÓTUM?

Á stefnumótum á að vera gaman því fólkið er að kynnast hvort öðru. Meira að segja strákar geta haft eitthvað að segja ef maður hlustar nógu lengi.
Lísa, 8 ára.

Á fyrsta stefnumótinu lýgur fólk bara hvort að öðru og það er yfirleitt nóg til að það hafi áhuga á að hittast aftur.
Magnús, 10 ára.

HVAÐ MYNDIRÐU GERA EF ÞÚ FÆRIR Á STEFNUMÓT SEM ENDAÐI ILLA?

Ég myndi hlaupa heim og þykjast vera dauður. Daginn eftir myndi ég hringja í öll blöðin og láta þau skrifa um mig í andlátsfréttunum.
Þorvaldur, 9 ára.

HVENÆR ER ÓHÆTT AÐ KYSSA EINHVERN?

Ef hann er ríkur.
Júlía, 7 ára.

Það er bannað með lögum ef maður er ekki orðinn átján ára og það er ekki sniðugt að lenda í einhverju veseni út af því.
Karl, 7 ára.

Reglan er sú að ef maður kyssir einhvern á maður að giftast honum og eignast með honum börn. Þannig á maður að gera.
Helgi, 8 ára

HVORT ER BETRA AÐ VERA EINHLEYP(UR) EÐA Í HJÓNABANDI?

Það er betra fyrir stelpur að vera einhleypar en það er verra fyrir
stráka. Það verður einhver að taka til eftir stráka.
Anna, 9 ára.

HVERNIG VÆRI HEIMURINN EF ENGINN GIFTIST?

Það væri alla vega erfitt að útskýra alla þessa krakka.
Kristján, 8 ára.

HVERNIG Á AÐ VIÐHALDA ÁSTINNI Í HJÓNABANDINU?

Maður á að segja konunni sinni að hún sé falleg, jafnvel þótt hún líti út eins og vörubíll.
Ríkharður, 10 ára.

Fjársjóður

Að gefnu tilefni þá hef ég verið að velta fyrir mér hvað það er sem skiptir máli í lífinu. Látum tilefnið liggja á milli hluta að þessu sinni en eftir því sem aldurinn færist yfir, þá minnkar eftirsóknin eftir "vindinum" og annað fer að skipta öllu máli. Eitt af því eru manns nánustu og samskiptin við þá. Konan mín, drengirnir mínir þrír, systkini, foreldrar sem ég er svo lánsamur að njóta enn og vinir mínir sem eru fáir en að mínu mati afbragð annarra manna. Ég gæti haldið áfram að telja en læt staðar numið hér en get þó ekki sleppt því að nefna hversu lánsamur ég er að geta kallað skapara himins og jarðar fyrir föður minn.

Eitt af því sem er mér afar dýrmætt er minningin um afa minn, Guðna Markússon frá Kirkjulækjarkoti. Ein minninganna er saglyktin af peysunni hans en ég heimsótti hann oft er hann lagði sig eftir matinn. Ég lagðist við hlið hans í sófanum og bað hann um að segja mér sögu. Aldrei brást það að afi sagði mér sögu, gjarnan af pabba þegar hann var lítill, og skipti þá engu máli hversu þreyttur hann afi minn var, alltaf hafði hann tíma fyrir pjakkinn.

Eitt af því sem afi minn gaf mér, fyrir utan kærleikann og umhyggjuna voru ljóð sem hann skrifaði til mín á 5, 6, og 7 ára afmælisdögunum mínum. Mér voru afhent ljóðin seint á unglingsárum mínum og glataði ég þeim í einhverju ógáti. En viti menn ég var að fara í gegnum dót frá mér og fann afrit af ljóðunum. Mér leið eins og ég hefði fundið fjársjóð, ég ætla hins vegar ekki að eiga þennan fjársjóð einn og ætla því að deila honum með ykkur:

Litli Heiðar ljúft er mér
Meistarann að biðja
að hann gefi ætíð þér
allt hið góða að styðja

Til Guðna Heiðars 30/1 ´69

Vertu Jesú vörður litla Heiðars
og vernda hann á lífsins hálu braut
svo ei hann villist út á veginn breiða
en alltaf halli sér í Drottins skaut
Frá afa Markússyni

30. jan. 1970 frá afa

Litli Heiðar láttu aldrei
líða þínum munni frá
orð sem særa eða valda
öðrum mönnum hryggðartár

Guð þig geymi Guð þig verndi
gæska hans er ný hvern dag
hann þig blessi hann þig verndi
heilagt orð sem bætir hag