Höldum vöku okkar !

Var að ljúka við að horfa á athyglisverða umfjöllun í Silfri Egils um trúarbrögð og trúariðkun. Fannst að vísu umfjöllunin stuttleg og sleppa ýmsu mikilvægu en eigi að síður mjög þarft að fá upp aðrar skoðanir en þær að banna alla trúariðkun t.d. barna í skólum.

Það var einn punktur sem mig langar til að draga upp og það er fullyrðing Sigurðar H. Gunnarssonar að Kristin trú eigi engan þátt í því að við lifum í jafn góðu þjóðfélagi og við lifum. Egill nefndi að í trúarbrögðum eins og Islam og Hindúisma væru réttindi kvenna fótumtroðið en hér nytu konur frelsis. Sigurður gat ómögulega séð að kvenfrelsi væri kristnu þjóðfélagi að þakka, þar sem slíkt hefði verið staðreynd 1950 árum eftir fæðingu Frelsarans.

Það er eins og aumingja maðurinn horfi á hlutina gegnum rör og skorti alla heildarmynd. Kristinn siðfræði Vesturlanda er grundvöllur þess þjóðskipulags sem við búum við í dag.

Öldum saman viðgekkst spilling meðal þeirra sem áttu að boða það frelsi og þau mannréttindi sem felast í boðskap Jesú Krists. Þar hugsuðu menn fyrst og fremst um að eiga og viðhalda völdum, m.ö.o. stýrðust af græðgi, í stað þess að boða mönnum frelsi. Það var ekki fyrr en á 16. öld er Marteinn Lúther negldi mótmæli á kirkjudyrnar í Wittenberg, þar sem hann setti fram í 95 greinum kenningar sínar um Kristna trú og leiðir til að endurbæta hana, að siðbót kirkjunnar hófst og menn fóru að skilja hvað Kristin trú boðar, auk þess sem trúin varð aðgengileg almenningi.

Kristin trú boðar frelsi og jafnrétti. Það er ekki trúnni eða Guði að kenna að menn hafa verið lengi að tileinka sér boðskap hennar og setja í framkvæmd. Guð gaf manninum frjálsan vilja og því miður hefur hann ekki alltaf farið vel með það frelsi. Ef við viljum halda áfram að lifa í jafn góðu þjóðfélagi og við lifum, þá skulum við standa vörð um Kristna trú og kristin gildi.

Trúarbrögð og innræting

Á morgun, sunnudaginn 27. febrúar kl. 12 mun Egill Helgason fjalla m.a. um trúarbrögð og þá umræðu sem hefur verið um þau mál undanfarið, í þætti sínum Silfur Egils sem sýndur er á Stöð 2 í opinni dagskrá. Ég veit að viðhorf hans er að hann er ánægður með að lifa í kristnu þjóðfélagi, finnst það gott og vill enga breytingu þar á. Það verður eflaust fróðlegt að fylgjast með umræðunni og heyra viðhorf viðmælenda hans sem eru, Jón Valur Jensson og Sigurður Hólm Gunnarsson. Dagskrá þáttarins hljóðar svo: "Þeir ræða heitt deilumál - kristindómskennslu í skólum, innrætingu og trúboð, siðferðisuppeldi og fjölmenningu og ýmislegt þessu tengt."
Vek athygli á því að þátturinn er endursýndur um kvöldið, einnig mun verða hægt að nálgast hann á www.visir.is.

Enn bætist í hóp bloggara

Hinn frábæri og fjölhæfi tónlistarmaður Gústi Bé er farinn að blogga. Ég get hiklaust mælt með Gústa, hann er drengur góður og hefur margt til brunns að bera. Bloggið hans finnur þú hér.

Viðhorf, markmið og framkvæmd

Maður nokkur gekk fram á þrjá menn á byggingarstað.
Hann spurði þann fyrsta: "Hvað ertu að gera?" - "Ég er að leggja steina."
Hann spurði þann næsta: "Hvað ertu að gera?" - "Ég er að hlaða vegg."
Maðurinn gekk að þeim þriðja og spurði hann sömu spurningar. Sá leit upp með bros á vör: "Ég er að byggja kirkju."

Í þessari stuttu sögu kristallast að til að vera góður framkvæmdamaður þarf að hafa þrennt að leiðarljósi:

Í fyrsta lagi þarf að hafa rétt viðhorf til þess sem við erum að gera, að sjá "kirkjuna."

Í öðru lagi þurfum við að ákveða hvaða veggi við ætlum að hlaða, þ.e. hver eru markmið okkar.

Í þriðja lagi þurfum við að leggja þá steina sem þarf til að hlaða vegginn. Án framkvæmda gerist ekkert.

Höfundur: Þorsteinn Garðarsson

Útlitsbreytingum að mestu lokið

Jæja, þá er breytingum á útliti vefsins að mestu lokið, aðeins eftir að fínslípa nokkur atriði. Fyrir utan útlitsbreytinguna sem er nokkur þó að uppsetningin og aðgengið sé hið sama, enda einfalt í notkun og þægilegt, þá er helsta breytingin sú að hægt er að setja inn fleiri athugasemdir en fimm. Í fyrri útgáfu var stuðst við "Backblog" en ritað í "Blogspot", nú er bæði ritað og gefnar athugasemdir í "Blogspot" og ótakmarkað hversu margar athugasemdir er hægt að skrifa. Einnig er nú mun aðgengilegra að líta yfir eldri færslur og sækja þær. Vona ég að gestum vefsins líki þessar breytingar vel og haldi áfram að heimsækja vefinn.

Ekki má gleyma því að ég naut dyggrar aðstoðar "Dreamweaver MX" séfræðingsins og vinar míns, Kristins Birgissonar og kann ég honum mínar bestu þakkir.

Lifið heil og megi Drottinn gefa ykkur góða vinnu- og/eða skólaviku.

Breytingar

Þar sem unnið er að breytingum á útliti vefsins, lítur hann hálf undarlega út. Vona ég að útlitsbreytingum verði lokið von bráðar og endanlegt útlit líti fljótlega dagsins ljós.

Einn góður !

Þó að maður hafi stundum áhyggjur af því að einhverjir "viðkvæmir" rekist inn á bloggið, þá ákvað ég að deila þessum brandara um skemmtilegan misskilning með ykkur. Brandarinn fjallar um framsóknarmanninn Alfreð Þorsteinsson og ung hjón:

Þegar ungur eiginmaður kemur heim eitt kvöldið tekur konan á móti honum með því að hlaupa upp um háls honum og segja; Ástin ég er kominn einn mánuð fram yfir. Ég er viss um að nú er ég ófrísk,en heimilislæknirinn okkar sagði að hann gæti ekki fullvissað mig um það fyrr en hann fengi niðurstöðu úr rannsókninni á morgun og við skyldum þegja yfir þessu þangað til.

Að morgni næsta dags kom maður frá Orkuveitunni til þess að loka fyrir rafmagnið, þar sem ungu hjónin höfðu ekki greitt síðasta reikning. Hann hringdi dyrabjöllunni og þegar unga frúin kom til dyra sagði hann; "Þú ert kominn mánuð fram yfir". "Hvernig í ósköpunum veist þú það?" spurði unga frúin. "Nú það er allt svona skráð kyrfilega í tölvukerfi Orkuveitunnar" var svarið. "Heyrðu þetta sætti ég mig sko ekki við og ég ætla að tala við manninn minn í kvöld og hann mun örugglega hafa samband við ykkur á morgun" sagði unga frúin og skellti hurðinni.

Þegar eiginmaðurinn kom heim fékk hann að heyra allt um persónunjósnir Orkuveitunnar og hann fór vitanlega öskuvondur á fund Alfreðs Þorsteinssonar morguninn eftir. "Heyrðu Alfreð þetta er nú algjörlega út í hött. Hvað eiginlega í ósköpunum gengur að ykkur, þið eruð með það í skrám ykkar að við séum komin mánuð fram yfir, ykkur kemur það bara ekkert við?".

"Slakaðu nú á þetta er ekkert mál, borgaðu okkur bara og þá tökum við þetta úr skránni okkar."svaraði Alfreð.. "Borga ykkur, ertu ekki í lagi, og hvað ætli þið svo sem að gera ef ég hafna því?" "Nú þá klippum við bara á og tökum þig úr sambandi." "Og hvað á konan mín þá að gera?" "Nú hún verður þá bara að nota kerti." Svaraði Alfreð.

Bollur

Á bolludaginn finnst mörgum bollum og ekki bollum gott að fá sér bollu eða bollur. Það eru svo sem engar bollur á mínu heimili en engu að síður finnst heimilisfólkinu gott að fá sér bollur. Ekki er samt gott að fá sér of mikið af bollum því þá er hætt við að bollunum fjölgi. Gallinn við bolluátið er að ótæpilega er lagt á útsöluverð þeirra í bakaríunum og því gott fyrir bolluætur að geta farið aðrar leiðir, svo sem eins og þá sem farin var á mínu heimili.

Hún er svona: Þar sem ég er karlremba (samkvæmt faglegri úttekt að mér skilst), þá kann ég ekki að baka. Sonur minn, hann Guðni Pétur (er sennilega ekki karlremba) er snjall bakari og töfraði ekki bara fram uppskrift, heldur setti gumsið saman og varð útkoman bollur, ljúffengar bollur. Ummmmmmmm og mun hagstæðara fyrir budduna.

Hér kemur svo uppskriftin:

Vatnsdeigsbollur (30 til 35 stk.)

4 dl. vatn,
160 gr. smjörlíki,
200 gr. hveiti,
1/4 tsk. lyftiduft,
5 egg ef bollurnar eru mótaðar með skeið en
6 egg ef notuð er rjómasprauta til að móta þær með.

Setjið vatn og smjörlíki í pott og látið suðuna koma upp. Blandið saman hveiti og lyftidufti, bætið því síðan í pottinn og hrærið hraustlega í með sleif þar til myndast hefur slétt og samfellt deig sem sleppir pottinum (þetta kallast bolla). Takið af hitanum og kælið aðeins. Hrærið síðan eggjunum saman við, einu í einu og hrærið vel á milli. Setjið með skeið á bökunarplötu eða með rjómasprautu. Ein matskeið er fyrir hverja bollu ef notuð er skeið og einn toppur fyrir hverja ef notuð er sprauta. Bakið í ofni´í 30 til 35 mín. við 210°C (200°C í blástursofni). Varist að opna ofninn fyrr en vel er liðið á baksturstímann.

Súkkulaðikrem:

100 gr. suðusúkkulaði
150 gr. smjörlíki
Brætt í potti við vægan hita. Að því búnu bætið í,
300 gr. flórsykur,
1/2 bolla mjólk,
1 teskeið vanilludropar.
Hrærið vel saman og leifið því að kólna aðeins. Smyrjið á bollurnar, allt eftir smekk.

Gætið þess svo að verða ekki að bollum og verði ykkur að góðu.