Breytir lífi !

Biblían var ekki gefin til þess að auka við visku okkar, heldur til þess að breyta lífi okkar.

Dwight L. Moody

Hefur Guð húmor?

Í Fréttablaðinu í dag er viðtal við Jón Gnarr sem að mestu gengur út á pistla hans en nú í haust mun Skálholtsútgáfan gefa út bók með skrifum hans í fyrrnefnt blað. Í viðtalinu ber grín á góma, enda Jón þekktur fyrir gamanleik. Eftirfarandi er m.a. haft eftir Jóni:

"Skilgreining okkar á Guði er sú að Guð grínist ekki, að Guð sé alvarlegt og þunglynt afl, sem er alrangt. Ég veit að Guð grínast, Guð er alveg stórkostlegur húmor."

Ég tel mig vera nokkuð vissan um að margir munu vera ósammála svo afgerandi fullyrðingu um húmor Guðs. Guð er heilagur og einhverveginn er það svo í huga margra að heilagleiki og húmor fara illa saman. T.a.m. hefur stundum verið fundið að prédikurum sem nota húmor til að koma boðskap sínum á framfæri. En er viðeigandi að nota húmor til að koma mikilvægum boðskap á framfæri, eða hefur Guð húmor?

Til þess að fá svar við þessu væri ekki úr vegi að líta aðeins á Jesúm sjálfan og spyrja sig að því hvort húmor hafi einhvertímann verið í orðum Jesú. Til þess að hægt sé að átta sig á því þá þarf að vita hvernig hebreskur húmor er. Í hebreskum húmor þykja ýkjur mjög fyndnar. Kíkjum á eftirfarandi dæmi um orð Jesú:

Í Fjallræðunni segir Jesús: "Hví sér þú flísina í auga bróður þíns, en tekur ekki eftir bjálkanum í auga þínu? Eða hvernig fær þú sagt við bróður þinn: ,Lát mig draga flísina úr auga þér? Og þó er bjálki í auga sjálfs þín. Hræsnari, drag fyrst bjálkann úr auga þér, og þá sérðu glöggt til að draga flísina úr auga bróður þíns." Matteus 7. 3-5

En Jesús sagði við lærisveina sína: "Sannlega segi ég yður: Torvelt verður auðmanni inn að ganga í himnaríki. Enn segi ég: Auðveldara er úlfalda að fara gegnum nálarauga en auðmanni að komast inn í Guðs ríki." Matteus 19. 23-24.

Samkvæmt þessum ritningarversum hefur Guð húmor og notaði húmor til að koma alvarlegum boðskap til skila. Heill bjálki í auga einhvers, trúlega hafa allir hlegið um leið og þeir meðtóku boðskapinn. Úlfaldi að troða sér í gegnum nálarauga, ha, ha, ha, mjög fyndið fannst Hebreum.

Stígum þó varlega til jarðar, líkjum eftir Jesú, og notum ævinlega hæfilega blöndu af húmor og alvarleika til þess að koma boðskap Guðs til skila. Fyrst og fremst þurfum við að hafa áheyrendur í huga og hvaða stíll er best til þess fallinn til þess að ná eyrum þeirra með mikilvægasta boðskap allra tíma. Boðskapinn um friðþægingarverk Jesú Krists, er hann var hæddur, píndur og kvalinn, og síðan nelgdur á krosstré til þess að ég og þú, með því að trúa á Hann, mættum lífi halda.

Maður trúar og bænar

Georg Mueller (1805-1898), forstöðumaður nokkurra munaðarleysingjahæla í Bristol, Englandi, var þekktur sem maður trúar og bænar. Það er stórkostlegt að lesa um þau bænasvör sem þessi maður upplifði á æfi sinni. En hvað gerði hann að manni trúar og bænar? Á sinni löngu æfi las hann í gegnum Biblíuna í meira en 200 skipti og í meira en helming þessara skipta las hann á hnjánum, biðjandi yfir Orðinu, rannsakandi það af ákafa.

Þegar þú þekkir Orð Guðs svo vel, þá muntu þekkja vilja Guðs fyrir lífið þitt. Þegar þú þekkir vilja Guðs, þá munt þú geta beðið á nákvæmari hátt og fengið nákvæmari svör.

Rick Warren

Lærum að þekkja Orð Guðs

En Jesús svaraði þeim: "Þér villist, því að þér þekkið ekki ritningarnar né mátt Guðs." Matteus 22:29.

Tvær megin ástæður fyrir falskenningum eða kenningarskekkjum eru gefnar hér af Jesú. Fólk villist kenningarlega vegna þess að það þekkir ekki Biblíuna né mátt Guðs.

Rick Warren

Ég skil ekki

Það hefur verið talsverð umræða um málefni leikskóla undanfarið í Reykjavík. Talað er um að 40 starfsmenn vanti í leikskóla borgarinnar og er bent á að helsta ástæða þess sé lág laun. Þó að þetta komi ekki við mig þar sem ég á engin börn á leikskólaaldri, þá þekki ég marga sem það gera og veit að þar sem að til stendur að senda hluta barna heim, þá mun þetta koma illa við þá.

Það er eitt í þessu sem ég skil ekki (er kannski sá eini). Þann 17. mars sl. kynnti borgarstjóri áform borgaryfirvalda um að öll reykvísk leikskólabörn njóti sjö stunda gjaldfrjálsrar leikskólavistar á dag. Áætlun þar að lútandi yrði framkvæmd í fjórum skrefum. Þriðja skrefið tímasett 2008 en það síðasta er ótímasett. Gert var ráð fyrir að kostnaðarauki Reykjavíkurborgar við gjaldfrjálsan leikskóla næmi 846 milljónum króna á ári.

Þó að ég hafi ekkert á móti því að barnafólk njóti svona fríðinda, þá er ég nokkuð viss um að sama barnafólkið vill frekar eiga sitt pláss og borga fyrir það, heldur en að eiga ekki kost á plássi. Væri því ekki nær að hækka laun leikskólastarfsmanna eða gera áætlun til 2008 um hækkun launa þeirra? Ef ekki eru til peningar til að hækka laun þeirra, hvernig eru þá til peningar til að bjóða uppá gjaldfrjálsan leikskóla?

Er einhver til í að útskýra þetta fyrir mér þannig að ég skilji það?

Líkur eða lík?

Í kvöldfréttum Útvarps heyrði ég setningu sem hljómaði einhvernvegin svona: "Þar sem gerendur fórust allir, er málið að miklu leyti byggt á líkum."

Það er einmitt það, hvort skyldi það nú vera?

666

Ég ásamt fjölskyldu minni nutum nú sem endranær þess að vera á Kotmóti en mér taldist til að þetta myndi trúlega vera ca. 37 mótið sem ég er á, þó svo að ég muni nú ekki fyrstu skiptin. Ekki sökum þokukennds ástands, heldur er ég alinn upp við það að vera á Kotmótum, allt frá fyrsta ári og var því 6 mánaða á mínu fyrsta móti.

Í gegnum árin hefur mér fundist mótin misgóð, tel að þar ráði hugarfar mitt hverju sinni mest um. Hvað sem segja má um það fannst mér mótið í ár betra en oft áður. Hvort það er m.a. vegna þess að yngsta barnið okkar á aðeins mánuð í tíunda árið og við Sigrún því ekki bundin yfir smábörnum lengur, veit ég ekki alveg en í það minnsta nutum við þess að hitta vini og kunningja án þess að hafa um leið áhyggjur af því að "litlu" börnin okkar týndust á meðan athyglin væri ekki algerlega á þeim.

Ég var afar ánægður með aðalgest mótsins sem var Stefan Christiansen. Stefan var afar áheyrilegur og náði vel til áheyrenda. En ekki bara það, heldur var það sem hann hafði fram að færa afar áhugavert, vel stutt af heilögu orði Guðs, Biblíunni.

Á sunnudeginum talaði Stefan um tákn síðustu tíma og hvernig lesa mætti nútíð og framtíð í ljósi ritningarinnar. Eitt það athyglisverðasta sem hann sagði var að á bakvið hvern tölustaf í hebreska stafrófinu er bókstafur. Og hvaða stafur skyldi vera á bakvið 6? Jú, nefnilega W! 666 er því WWW, ef stuðst er við stafrófið. Og hvað stendur www fyrir? Jú Internetið (World Wide Web). Það skyldi þó ekki vera að Internetið stæði fyrir Dýrið sem talað er um í Opinberunarbókinni? Athyglisverð kenning sem áhugavert er að velta fyrir sér.

Og það lætur alla, smáa og stóra, auðuga og fátæka og frjálsa og ófrjálsa, setja merki á hægri hönd sér eða á enni sín og kemur því til leiðar, að enginn geti keypt eða selt, nema hann hafi merkið, nafn dýrsins, eða tölu nafns þess. Hér reynir á speki. Sá sem skilning hefur reikni tölu dýrsins, því að tala manns *1 er það, og tala hans er sex hundruð sextíu og sex.
Opinberun Jóhannesar 13.16-18.

*1 Tala manns? Hver skapaði Internetið? Jú maðurinn.

Án þess að ég þori að fullyrða um, þá er eflaust hægt að kaupa upptöku af samkomunum með Stefani, annað hvort á Lindinni eða í Fíladelfíu.