Málshættir

Einn er sá siður sem fest hefur sig í sessi á meðal þjóðarinnar og sérstaklega er tengdur páskunum. Mikið rétt, það eru allir málshættirnir sem streyma fram úr páskaeggjunum. Nokkur lítil egg slæddust inn á heimili okkar fyrir skemmstu með þeim tilgangi að gefa bragðlaukum heimilisfólks forskot á eggjasælu páskanna. Einn málsháttanna fannst mér "skemmtilegur" og ákvað að deila honum með ykkur:

Einhvern tíma brennir sig sá sem öll soð vill smakka. Þá gæti reyndar verið gott að hafa í huga annan málshátt sér til varnar, hann er:
Ekki er allt fyrir augunum, sem eta skal. Í lagi er nú samt oft að smakka. Í því sambandi væri gott að hafa í huga að: Enginn verður af einum bita feitur. En vilji maður vera öruggur skal hafa í huga að: Fleira má bíta en feita steik og Gleymt er þá gleypt er.

Sennilega er því gott að hafa í huga að: Allt er best í hófi og Allt er leyfilegt en ekki er allt gagnlegt.

Klara og fyrsta snuddan

Hún Klara afa- og ömmustelpa var í pössun hjá ömmu um daginn. Hún var orðin svolítið svöng og brá þá amma á það ráð að gefa henni snuð. Það væri svo sem ekki í frásögur færandi nema vegna þess að þetta var í fyrsta skipti sem Klara fékk að smakka snuð. Ef þú vilt fá að vita hvernig henni líkaði þá getur þú séð það hér.

Fleiri myndir er svo að finna hér.

Nafnið Klara

Samkvæmt þjóðskrá 31. desember 2004 eru: 219 sem bera nafnið Klara sem 1. eiginnafn og 110 sem bera nafnið Klara sem 2. eiginnafn.

Nafnið Klara er leitt af latneska lýsingarorðinu "clarus" sem merkir tær, - hreinn, -bjartur.

Nýtt myndaalbúm

Hef uppfært myndaalbúmið og gert það mun aðgengilegra. Ásamt áðurútgefnum myndum hef ég bætt inn nýjum myndum af Klöru afa- og ömmustelpu. Einnig hef ég sett inn gamlar myndir af Sigrúnu og fj., en Friðrik bróðir Sigrúnar sendi henni nýlega myndir sem hann skannaði úr gömlum filmum. Myndaalbúmið finnur þú í vinstri dálki en getur líka farið beint þangað hér.

Myndir og heimasíða

Ég hef sett inn nokkrar myndir af afastelpunni, þú finnur þær hér. (Getur tekið smástund að opnast).

Klara á sína eigin heimasíðu, hana er að finna hér.

Og sagan heldur áfram

Fyrir u.þ.b. sex mánuðum upplýsti ég lesendur síðunnar um að senn hæfist nýr kafli í sögunni okkar Sigrúnar. Yfirskrift kaflans er: "Að vera afi og amma." Og nú er komið að kaflaskilum, því kl. 00:30 kom í heiminn undurfalleg hnáta. Hún er 10 merkur og 49 cm, lík pabba sínum og með tærnar hennar mömmu sinnar. Edgar og Guðrún hafa þegar valið henni nafn og heitir hún því fallega nafni Klara og er því Klara Edgarsdóttir. Við Sigrún erum afar stolt og hamingjusöm með litlu dömuna. Okkur hlakkar til að takast á við nýtt hlutverk og getum ekki beðið eftir því að fara að dekra við litlu perluna sem við vitum að á eftir að krydda tilveru okkar og veita okkur ómældar gleði- og ánægjustundir.

Hvað óttast þú?

Það voru einu sinni úlfur, ljón og önd að tala saman og metast sín á milli. Úlfurinn sagði: "þegar ég urrrra, þá skelfa öll smádýrin í skóginum!" Þá sagði ljónið: "þegar ég öskra þá skelfur allur skógurinn!" Þá sagði öndin: "isssss...... það er ekkert.... ef ég hnerra þá skelfur öll heimsbyggðin!"

Já, það má segja að fuglaflensan hefur breytt matinu á því hvað menn óttast mest.

Sjálfsblinda

Gallar annarra eru eins og bílljós, þeir skera okkur meira í augun en okkar eigin.

Höfundur ókunnur

Gullkorn

Vinur minn var spurður spurningar í dag. Hann svaraði svo skemmtilega að ég hef bætt svarinu hans við í gullkornasafnið. Finna má spurninguna og svarið efst í gullkornasafninu í h-dálki síðunnar.

Betra líf

"Ég hef farið í "naflaskoðun" og fundið út að það væri lausn á mörgum vandamálum að eiga fullt af peningum því þá gæti ég verið rausnarlegi og í kjölfarið liðið betur með sjálfan mig sem manneskju. Ef ég ætti fullt af peningum þyrfti ég ekki að einblína á innkomu mína en þess í stað einbeitt mér að því að njóta vinnunnar. Ef ég nyti vinnunnar án tillits til tekna mundi það smita út frá sér og fleiri mundu vilja vera í viðskiptum við mig. Þar með væri ég kominn í himneskan hring fjárhagslegs stöðugleika og hamingju. Ég veit ekki hvort þetta hljómar rökrétt fyrir ykkur en það gerði það fyrir mér.

Í dag hef ég komist að því að þetta er alröng forgangsniðurröðun. Númer eitt, tvö og þrjú er að njóta vinnunnar. Ef ég nýt þess að vinna vinnuna mína vel, ef ég hnika ekki frá eigin réttlætiskennd og ef ég samgleðst þeim sem ég vinn vel fyrir þá mun það alltaf á endanum skila mér því lífi sem ég sækist eftir. Innifalið í því sem ég sækist eftir er fjárhagslegt öryggi en það er ekki forsendan fyrir því."

Fréttablaðið 5. mars 2006 - Útdráttur úr bakþönkum Vernharðs Þorleifssonar

Um trúna

TRÚ, SEM HEFUR EKKI BREYTT LÍFI ÞÍNU, HEFUR EKKI FRELSAÐ SÁL ÞÍNA.

Höfundur óþekktur