Í gegnum árþúsunda langa sögu mannkyns hefur náttúran stjórnað lifnaðarháttum fólks.
Maðurinn lifði í samræmi við hana og dýrkaði hana sem guð. Með tilkomu tækni og
iðnaðar er manninum að takast að ná tökum á öflum náttúrunnar, þó hann muni alltaf
verða uppá hana kominn.
Nú er svo komið að maðurinn hefur með tækni sinni náð að beisla og skapa annan
vágest sem er jafnvel enn ógnvænlegri en náttúran sjálf, kjarnorkuna. Þó tekist hafi að
beisla þetta ógurlega afl með tilkomu kjarnaofna stafar gríðarlegri ógn af því. Ógjörningur
er að meta hversu margir eiga eftir að deyja af völdum sjúkdóma sem rekja má til
geislavirkra efna sem láku út þegar sprenging varð í Chernobyl kjarnorkuverinu, en talið
er að yfir milljón manns muni deyja fyrir aldur fram. Samanlagt létust um 200.000 manns
eftir sprengjurnar sem varpað var á borgirnar Hiroshima og Nagasaki við lok seinni
heimstyrjaldarinnar. Gífurlegt magn geislavirkra efna hefur lekið út í andrúmsloftið vegna
kjarnorku-tilraunasprenginga og mistaka í kjarnorkuverum.
Ég veit ekki með hverju verður barist í þriðju heimstyrjöldinni en í þeirri fjórðu verður barist með steinum og spýtum.
-- Albert Einstein --