MBL Innlent | 21.05.2001 | 16:36
http://www2.mbl.is/mm/frettir/show_framed_news?cid=1&nid=711873
Hjólreiðakappi leggur af stað í langferð
Sigursteinn Baldursson hjólreiðamaður heldur síðdegis af landi brott til að hefja háfjallaleiðangur sinn á
fjallahjóli frá nyrstu strönd Alaska að syðsta odda Argentínu. Fyrirhuguð leið er 33 þúsund km löng, þar
af 400 km á vegum og mun hjólaferðalagið vera hið lengsta sinnar tegundar í heiminum.
Leið Sigursteins liggur um 15 þjóðlönd eftir torfærum stígum og slóðum. Hyggst hann ennfremur klífa
hæsta fjall hvers lands á leiðinni, m.a. tvo af Hátindunum sjö, annars vegar hæsta fjall Norður-Ameríku,
McKinley sem er 6.194 m hátt og hins vegar hæsta fjall Suður-Ameríku, Aconcagua 6.595 m. Leið
Sigursteins liggur eftir tveimur fjallgörðum, Klettafjöllunum og Andesfjöllunum en alls áætlar hann að
vera tvö ár á leiðinni suður til Argentínu.
Sigursteinn sagði á blaðamannafundi í dag að kvíðvænlegasti þáttur ferðarinnar væri sjálfur
brottfarardagurinn þegar komið væri að kveðjustund. Sagði hann að þótt kílómetrarnir væru margir væri
ekki aðalmarkmiðið að safna þeim sem slíkum, heldur minningum á fjölbreyttri leið.
Vegna leiðangursins hafa Skólavefurinn ehf. og nokkrir valdir skólar á landinu ákveðið að nýta tækifærið
og búa til námsefni sem tekur mið af því svæði sem Sigursteinn fer yfir á ferð sinni. Námsefnið verður
unnið af nemendum í samvinnu við Sigursteinn og vistað á Netinu. Bakvarðasveit Sigursteins er skipuð
Herði Gunnarssyni markaðsstjóra, Þorkatli Þorkelssyni ljósmyndara og Þorsteini G. Gunnarssyni fjölmiðla- og upplýsingafulltrúa.
Sigursteinn Baldursson, fyrir miðju, ætlar að hjóla á milli póla næstu tvö ár. mbl.is/Jón Svavarsson