Eftirfarandi umsögn fengu Nefndasvið Alþingis, Hjálmar Árnason 10 þm. RN, F, HjÁ þflvform. og Vilhjálmur Egilsson 1 þm. NV, S, VE Sendu lika umsögn með því að smella hér
Reykjavík, 13. mars 2002
Umsögn um frumvarp til umferðarlaga.
Kæru þingmenn
Það er ekki laust við að mér finnist þið hafið eyðilagt
fyrir mér þá tiltrú sem ég þó hafði á ykkur sem þingmönnum. Þið virðist
vera alveg komnir úr tengslum við umhverfið og raunveruleikann þegar þið
ætlið að knýja fram frumvarp til laga um að leyfa hægri beygju mót rauðu
ljósi.
Sem óvarinn vegfarandi lit á þetta sem morðtilraun við
mig. Mér sýnist þurfa að upplýsa ykkur um ástand umferðamála sem er vægast
sagt ömurlegt á Íslandi hvort sem þið trúið því eða ekki. Hvers vegna
haldið þið að foreldrar keyri börn sín í og úr skóla? Haldið þið að
það sé vegna góðsemi foreldranna? NEI, það er vegna þess að umferðin
í Reykjavík er svo tillitslaus og harkaleg í garð óvarina vegfarenda að
ekkert hugsandi foreldri vill vita af börnum sínum á vappi milli bílanna.
Hjálmar. Þú
sagðir ósatt á Stöð 2 þann 12. mars s.l. að reynsla Bandaríkjanna væri
jákvæð. Hún er svo slæm að Nýsjálendingar ákváðu að taka þetta ekki
upp hjá sér.
Ef þú heldur að þetta flýti fyrir akandi umferð þá
get ég sagt þér það að þessi hægri beygja mót rauðu ljósi tefur fyrir
allri annarri umferð t.d. gangandi og hjólandi. Sú umferð á ekki að lúta
í lægra haldi fyrir akandi umferð meira en komið er.
Ég hvet ykkur til að skoða eftirfarandi krækjur og lesa
þær til enda svo þetta hörmulega frumvarp verði aldrei að veruleika. Ég
vil fá að ræða þetta mál við ykkur augliti til auglitis ef þið ætlið
ekki að skipta um skoðun því í mínum huga er ég að berjast fyrir lífi mínu
og örugglega annarra.
http://www.ltsa.govt.nz/legislation/road_user/rur_left_turn.html
http://www.ltsa.govt.nz/legislation/road_user/rur_left_turn.pdf
http://www.walkinginfo.org/de/curb1.cfm?codename=41f&CM_maingroup=SignalsandSigns
Það þarf mun frekar að afleggja þær hægri beygjur
sem nú þegar eru leyfðar í skipulagi svo bæta megi umferðarmenninguna á
Íslandi í samræmi við það sem er að gerast í nágrannalöndum. Ég hef
hjólað víða um lönd og sjaldan verið í nokkurri hættu. Hér á landi þakka ég forlögunum
hvern dag að halda lífi og limum. Ég vona að þið sýnið þá dómgreind að
draga þetta mál til baka svo þið sólundið ekki tíma alþingis í þvílíka
fásinnu. Þið verðið menn að meiri ef þið þorið að viðurkenna að
ykkur hafi orðið á þau mistök að taka ákvörðun að óathuguðu máli.
Kveðja
Magnús Bergsson
Tunguvegi 13