Það er ofurlítið óraunverulegt en um leið mjög svo spennandi að vera loksins komin til útlanda í nám. Eitthvað sem ég hef ætlað að gera í mörg herrans ár en núna fyrst er tækifærið komið. Og ég ætla að njóta þess í botn...:-)

Ef einhver skyldi ekki vita það, þá er skólinn sem um ræðir háskólinn í Cardiff eða Cardiff University sem reyndar sameinaðist í sumar öðrum háskóla, University of Wales. Eins og geta má nærri hefur þessi sameining orðið til þess að pappírsflóð hefur margfaldast og ýmsir örðugleikar komið upp á stjórnunarsviði. Margt sem þarf að samhæfa og sumt hefur verið gert á ansi ólíka vegu í skólunum. Nemar finna dálítið fyrir þessu en þó mest fyrir pappírsvinnunni og hugsanlega (nefni engin nöfn) töfum á tölvuinnsetningu.

Námið sem ég er í heitir MSc in Genetic Counselling eða meistaranám í erfðaráðgjöf. Við erum 12 í bekknum, 8 enskar og 4 ekki. Kennarar koma frá ýmsum stöðum og með mikla þekkingu. Tvo daga í viku er verklegt nám og fyrsta staðan mín í því er í Hollies skólanum, skóla fyrir fötluð börn.
Tvo daga erum við í akademísku námi og svo eru einstaka fyrirlestrar á milli. Skólinn er um margt ólíkur okkar háskóla en auðvitað eru greinarnar mismunandi. Það er ekki mikið um beina fyrirlestra í mínum bekk og áhersla lögð á að við spjöllum saman og við kennarann - sem sagt allt á jafningagrunni. Fyrir tæknifrík eins og mig, mætti nota tæknina meira og ég á eftir að skoða það nánar í samvinnu við kennarana...

Fyrsta vikan fór í að kynnast skólanum og umhverfi hans. Góð vika og margt brallað. Ég ætla að nota þessa síðu til að halda utan um námið og setja inn það sem mér finnst áhugavert.