Eins og fram hefur komið þá heiti ég Nökkvi Elíasson eða öllu heldur Erlingur Nökkvi Elíasson, svo fullt nafn sé notað. Ég er 43 ára gamall áhugaljósmyndari búsettur í Reykjavík. Byrjaði minn ljósmyndaferil fyrir um 25 árum, hef að mestu leyti einbeitt mér að svart/hvítum ljósmyndum, og undanfarin 20 ár helgað mig eyðibýlum og öðrum yfirgefnum mannvirkjum. Verk mín hafa birst víða, meðal annars á bókarkápum, CD hulstrum, tímaritum og í dagblöðum svo eithvað sé nefnt. Í því sambandi má einmitt nefna opnu í Morgunblaðinu í september 1997, sem tileinkuð var ljósmyndum mínum af eyðibýlum. Ég hélt mína fyrstu stóru sýningu í Ljósmyndasafni Reykjavíkur í febrúar 2001 og var það samsýning okkar Brians Sweeney þar sem þemað var einmitt eyðibýli. Þessari sýningu var síðan framhaldið í Pakkhúsinu á Höfn í Hornafirði í apríl sama ár. Nú fyrir skemmstu kom síðan út bók hjá EDDU útgáfu með mér og ljóðskáldinu Aðalsteini Ásbergi Sigurðsyni. Bók sem tileinkuð er einmitt íslenskum eyðibýlum.