Spegilmyndir

Spegilmyndir eru ansi skemmtilegt fyrirbæri.  Þú getur tekið hvaða mynd sem er (eða hluta úr mynd) og tekið afrit af henni.  Síðan límirðu afritið á hvolfi undir upprunalegu myndinni þannig að efri hluti afritsins rennur saman við neðri hluta upprunalegu myndarinnar. Það sama gerirðu til hliðar (speglar lóðrétt) og niðri til hægri (speglar bæði lóðrétt og lárétt).  Þetta er auðvelt í Photoshop en er líka hægt í einföldum forritum eins og Paint (sjá neðst uppskrift að spegilmyndum).
 

Þessi bakgrunnur var hannaður sérstaklega með myndlistarsíðu í huga. Bakgrunnurinn þurfti að vera myndrænt nógu einfaldur til að draga ekki athygli frá aðalmyndefninu (myndlistinni á síðunni) en hafa samt sem áður eitthvað markvisst að segja. Hérna er ég með mynd af teningum í þvívídd og þegar þeim er raðað saman á þennan hátt koma greinileg fjarvíddarárhif í ljós. Þessi einfalda mynd er því myndlistarnám í hnotskurn. Út frá þessari einu mynd bjó ég til ýmsar útgáfur af sama bakgrunni í mismunandi litatón og með mismunandi áferð.

 
 
Spegilmyndir er einnig hægt að nota til að búa til óræð mynstur. Þegar ég leitaði að bakgrunni fyrir B.A.ritgerðina mína (sem fjallaði um Jörðina) þótti mér spegilmyndir tilvaldar enda gat ég tekið litla mynd af hluta af Jörðinni og speglað hana um sjálfa sig. Fyrir vikið kemur út samhverf mynd sem - eins og flestar samhverfar myndir - minnir á persónu eða veru. Það var afar heppilegt því ritgerðin fjallaði nánar tiltekið um Jörðia sem "lífveru".
 
 
 
Spegilmyndir geta búið til ótrúlegustu mynstur úr nánast hvaða myndefni sem er. Tökum andlitsmynd sem dæmi. Ef við veljum hluta úr andlitinu (þannig að andlitið skerist við jaðarinn) þá kemur út ansi skemmtileg kynjavera. Árangurinn er alltaf jafn óvæntur og líflegur. Hins vegar er oft vafamál hvort myndir sem þessar nýtist vel sem bakgrunnur. Til þess eru þær líklega of truflandi sem slíkar enda eru sjónræn áhrif ef endurtekinni mynd í þessum dúr of geðveik til að teljast þægileg.
 
 
 

Skemmtilegast þykir mér þó að taka einhverja stafi og staðsetja jaðar myndarinnar þannig að endimörkin skeri stafina í miðju. Síðan mæta þeir sjálfum sér og búa til mjög einkennileg mynstur. Þessa mynd notaði ég í síðu sem fjallaði um tungumál og innihélt alls kyns orðaleiki og undarlegar tungumálspælingar. Ég gat ekki hugsað mér heppilegri bakgrunn því þessir "kynjastafir" minna á stafi en eru það samt ekki og koma þess í stað út sem form - list.
 
 
 
 
 Uppskrift að spegilmyndum
fyrir þá sem ekki hafa aðgang að Photoshop
 
1) Afritar mynd (eða myndhluta)  
2) Opnar Paint.  
3) Ferð í Image/ Attributes og stillir þar stærð blaðsins sem þú vinnur með.  Hafðu blaðið stærra en tvöfalt afrit af myndinni sem þú hefur.  Ég er yfirleitt með litlar myndir og stilli Height=10 og Width=10.  
4) Nú límirðu myndina á blaðið með Ctrl + V (Paste).  Hún fer sjálfkrafa upp í vinstra horn blaðsins.  
5) Þetta endurtekurðu þrisvar (afritið fer yfir fyrstu myndina - en er færanlegt) og í hvert skipti færirðu myndina til á blaðinu þannig að hún smelli upp að fyrstu myndinni.  
6) Áður en þú staðfestir staðsetningu hverrar myndar (enter) skaltu velja Image/ Flip /og velur þar ýmist Horizontal/Vertical eða hvort tveggja eftir því hvort þú ert með myndina uppi til hægri, eða myndirnar tvær niðri.  
7) Nú skal afmarka heildarmyndina með kassalaga valtákni (select) og afritið hana (ctrl + C).  
8) Þetta er nú hægt að fara með í nýtt skjal (File - New - og velja lága tölu í Image/Attiributes því þá lagar stærð blaðsins að myndinni) eða í nýtt forrit og vinna það þar nánar.