ES: Til gamans má geta að ég veit að mér verður boðið út að borða í kvöld þar sem Pétur sem missti af gullinu var dreginn út í útdráttarverðlaununum og fékk út að borða fyrir tvo.
ES.ES: Myndir frá hlaupinu og verðlaunaafhendingu hér.

- Úr bloggi á vef skokkhópsins Hamars 1. ágúst 2010

Lífsreynsla
Vildi þakka fyrir frábæra umgjörð um hlaupið. Þetta var dásamleg lífsreynsla og krefjandi

- Fjalar Jóhannsson, hljóp Barðsnes 2008

Kveðjur frá Svíþjóð
Thank you for a lovely race. I´ll never forget it.
Best regards,

- Rune & Margaretha Svensson
Vilshult, Sweden (hlupu 2006)

Blóð, sviti og tár
Ég tók þátt í Barðsneshlaupinu um síðustu helgi. Þetta er alveg magnað hlaup og útheimti blóð,svita og tár ... eða allt að því ... Ég þyrfti endilega að koma þökkum til þeirra sem fengu mig af því að hlaupa í þykku hettupeysunni, enda hefði ég líka ekki komist á leiðarenda í henni, slík var veðursældin.

- Bjarki Steinn, hljóp 2006.

Á ókunnum en öruggum slóðum
Allir voru ferjaðir á gúmmíbáti frá Neskaupstað til Barðsness, það var skemmtileg upplifun. Tímasetningar stóðust, drykkjarstöðvar vel mannaðar og maður hafði ekki á tilfinningunni að maður bæri beinin þarnaí fjöllunum þó maður væri einn og yfirgefinn á ókunnum slóðum. Ég mæli með Barðsneshlaupi sem utanvegahlaupi.

- Þorlákur Axel Jónsson, hljóp 2005.

Af skokki og sundi skógarvarðar
Þór Þorfinnsson skógarvörður á Hallormsstað hefur á undanförnum árum brugðist við árlegum hnífsbrögðum fjárveitingavaldsins með því að hlaupa í stað þess að aka. Það er líka svo mikið náttúruvænna. Hann lætur sig ekkert muna um að skokka á fundi í Egilsstaði, kaffi í Klaustur eða annað það sem er innan við dagleið.

Í sumar [2005] tók hann svo þá ákvörðun að reyna sig í öðrum og óþróaðri byggðarlögum og skráði sig í ófæruhlaup það sem Norðfirðingar efna til árlega og kallast Barðsneshlaup. Í því eru hlaupnir á þriðja tug kílómetra frá Barðsnesi um Viðfjörð og Hellisfjörð til Norðfjarðar. Í Hellisfirði háttar svo til að árósinn í fjarðarbotni er hyldjúpur en þokkalegt vað skömmu ofar. Okkar maður var ekki kunnugur staðháttum og fór því stystu leið eftir sjávarkambinum og beint út í ósinn. Þegar vatnaði undir hökuna, hvarflaði að honum sú hugsun að hann gæti drukknað ef hann héldi áfram. Sneri hann því aftur til sama lands, hljóp spölkorn upp með ánni og lagði aftur í ána. Aftur náði vatnið honum í höku, en í þetta skiptið greip hann sundtökin og svamlaði yfir og tók síðan til fótanna áleiðis til Norðfjarðar, rennblautur og kaldur. Vatnsbrúsarnir sem hann hafði borið í beltisstað flutu niður eftir ánni og sáust ekki meir. Það sem eftir var leiðarinnar varð hann því að sjúga úr fötum sínum til að slökkva þorstann.

Þess má svo geta að seinna um daginn þurfti að senda hraðbát björgunarsveitarinnar í Hellisfjörð eftir sumardvalargesti sem var í andnauð eftir óstjórnlegan þriggja tíma hlátur og að á næsta ári verður skipulögð keppni bæði í Barðsneshlaupi og Hellisfjarðarsundi.

Í Barðsneshlaupið brá ég mér,
Brattur um hlíðar spretti
Átti samt ekki von á því
Að þurfa að synda yfir Hellisfjörð !

[Bragarháttur þessi er víst kallaður stafl á Héraði.]

- www.tinytota.blogspot.com

Torfæruhlaup
Barðsneshlaupið er um margt sérstakt hlaup. Fyrir það fyrsta eru hlauparar ferjaðir frá marklínu hlaupsins í Neskaupstað á slöngubát yfir fjörðinn á Barðsnesið þaðan sem hlaupið er. Þegar svo hlauparar eru komnir af stað þurfa þeir að renna um mýrar og mold, hlaupa í urð og grjóti, stökkva yfir læki og vaða ár, hlaupa um holt og hæðir. En það er einmitt þessi temmilega torfæra braut sem gerir Barðsneshlaupið svo skemmtilegt og fallegt er landið.

- Kristinn Pétursson, hljóp 1999 og 2003.

Fjölbreytt og skemmtilegt
Það voru þreyttir en ánægðir menn sem báru saman bækur sínar í heitu pottunum að hlaupi loknu. Var það almennur rómur okkar, sem vorum að þreyta þetta hlaup í fyrsta sinni, að þetta væri eitthvert skemmtilegasta og fjölbreyttasta hlaup sem við hefðum tekið þátt í og að frábærlega vel hafi verið að öllu staðið af hendi heimamanna. Ingólfi, sem er upphafsmaður þessa hlaups eru hér með færðar sérstakar þakkir fyrir að hafa hvatt okkur að mæta.

- Hreyfingarhlauparar, hlupu 2000.

Alvöru víðavangshlaup
Þetta hlaup var öðruvísi en öll hin! Frá Barðsnesi var hlaupið meðfram ströndinni eins og land liggur um hina þrjá firði sem ganga inn frá Norðfjarðarflóa: Viðfjörð, Hellisfjörð og Norðfjörð. Ca. 27 km um mjög fjölbreytt land. Alvöru víðavangshlaup yfir móa og mela og um þröngar og krókóttar kinda- og hestagötur. Gott fyrir fótvissa en þurfti að hafa einbeitinguna í lagi. Lítið um brekkur nema Götuhjalli upp frá Hellisfirði um 200 m hækkun.

- Trausti Valdimarsson, hljóp árin 2000 - 2004.

Ævintýranleg sigling
Siglingin yfir að Barðsnesi með björgunarbátnum Hafbjörginni var ævintýri líkust og einhver skemmtilegasta og óvanalegasta aðkoma að hlaupi í okkar minnum.

- Hópur hlaupara frá Hreyfingu sem hljóp árið 2000.